Concello de Guitiriz

O Concello de Guitiriz é un concello aliado de O Camiño Sostible e camiña con paso firme cara a un modelo máis respectuoso co medio ambiente.

Como parte do seu compromiso coa sostibilidade, o concello promove bos hábitos na xestión dos residuos e ofrece á veciñanza servizos que facilitan a separación correcta, o aproveitamento da materia orgánica e a reciclaxe dos principais fluxos de lixo doméstico.

Aquí atoparás toda a información necesaria para participar nas campañas activas e saber que residuos van en cada contedor.

Apúntate ás campañas activas!

Se vives en Guitiriz, podes participar nas campañas de compostaxe
e contedor marrón para contribuír a reducir os residuos e mellorar o teu entorno.

Compostaxe comunitaria

Compostaxe comunitaria

Se vives preto dunha illa de compostaxe comunitaria, podes participar de forma sinxela nun sistema colectivo de aproveitamento dos residuos orgánicos. Só terás que entregar os teus restos orgánicos no punto asignado, con apoio e formación inicial.

Compostaxe doméstica

Se tes horta ou xardín, podes recibir un composteiro individual e participar nunha campaña de compostaxe adaptada á túa vivenda. Inclúe formación, materiais divulgativos e visitas de seguimento para que aproveites ao máximo os teus biorresiduos.

Campaña de contedor marrón veciñanza

Separas os restos de comida no teu fogar? Solicita o teu caldeiro marrón «de balde» e colabora na recollida separada da fracción orgánica. Recibirás información clara e materiais útiles para facelo ben desde o primeiro día.

Campaña de contedor marrón medianos e grandes produtores

Se tes un negocio e es gran produtor de residuos orgánicos no Concello (comercio, bar, restaurante, hotel, etc.) podes reciclalos grazas ao colector marrón. Recibirás asesoramento e material.

Contedor textil

👉 A campaña de recollida de téxtiles desenvólvese en colaboración con Texlinca, entidade que recolle a roupa e o calzado depositados e lles dá un destino social, apoiando a persoas e familias en situación de vulnerabilidade.

Como usalo:
• Podes depositar roupa, calzado e téxtiles do fogar en bolsas pechadas e limpas.
• ❌ Non se admiten colchóns, alfombras, téxtiles mollados ou materiais contaminados.
• ♻️ As pezas recollidas son destinadas á reutilización ou á reciclaxe, evitando residuos innecesarios.

Para reforzar a campaña, o Concello está a desenvolver talleres educativos, postos informativos e material divulgativo ao longo deste ano.

Os residuos en Guitiriz

Contedor amarelo (envases lixeiros)

  • Envases de plástico, latas, briks, tapas e envoltorios.
  • Non vai: xoguetes, plásticos con restos e utensilios de cociña.

Contedor verde (vidrio)

  • Botellas, frascos e tarros de vidro.
  • Non vai: tapóns, espellos, cristais rotos, vasos e lámpadas.

Contedor azul (papel e cartón)

  • Caixas, xornais, bolsas e sobres de papel.
  • Non vai: papel sucio, briks, toalliñas e cueiros.

Contedor vermello (téxtil)

  • Roupa, calzado e téxtiles do fogar (sempre en bolsas pechadas).
  • Non vai: roupa mollada, colchóns e alfombras.

Contedor laranxa (aceite usado)

  • Aceite de cociña usado (en botellas de plástico pechadas).
  • Non vai: aceite de motor, graxas industriais e envases abertos.

Contedor verde (resto)

  • Cueiros, vaixelas rotas ou lixo non reciclable.
  • Non vai: orgánica, reciclables ou residuos perigosos.

Compostaxe doméstica

  • Transforma os teus restos orgánicos en compost se tes horta ou xardín.
  • Recibirás un composteiro, formación e seguimento.

Compostaxe comunitaria

  • Leva os teus restos á illa de compostaxe máis próxima.
  • Non vai: carne, peixe, plásticos ou produtos procesados
  • Localizacións:
    • Diante da Garda Civil
    • Rúa Tralouteiro (aparcamento público)
    • Avenida da Paz (en Parga)

Punto SIGRE (medicamentos)

  • Envases baleiros, caducados ou restos de medicamentos.
  • Atoparás o punto SIGRE en calquera farmacia.
  • Non vai: xeringas, termómetros ou produtos químicos.

Voluminosos

  • Mobles, colchóns, electrodomésticos grandes, etc.
  • Contacta co concello para a recollida ou lévao ao punto limpo.
  • Non vai: Residuos perigosos ou lixo en bolsas.

Hai recollida unha vez ao mes, con previa comunicación do domicilio ao concello.

Punto limpo móbil

  • O punto limpo móbil percorre as parroquias de Guitiriz.
  • Podes levar: pilas, lámpadas, pequenos electrodomésticos, teléfonos, CDs/DVDs, cargadores, cartuchos de tinta, roupa, etc.

Anúncianse as localizacións de cada semana polos medios do concello.

Punto limpo de proximidade

  • O Concello de Guitiriz conta con varios puntos de proximidade repartidos polo municipio, pensados para facilitar á veciñanza o depósito de residuos especiais de pequeno tamaño, sen necesidade de desprazamentos longos.
  • Pilas, cartuchos de tinta, móbiles antigos, cargadores, pequenos RAEE, CDs e DVDs.

Localizacións dispoñibles:

  • Campo da feira de Guitiriz
  • Avenida de Lugo
  • Rúa do Ferrocarril en Parga

Novas