O Porriño celebra o Día da Sostibilidade cun gran evento participativo este sábado 22 de novembro
O Concello do Porriño celebrará este sábado 22 de novembro o Día da Sostibilidade cun gran evento participativo que converterá a Praza do Concello nun espazo aberto ao coñecemento, á educación ambiental e á convivencia veciñal. Desde ás 12 da mañá hasta ás 19h, toda a praza encherase de actividades, xogos, demostracións e stands divulgativos centrados na correcta separación dos residuos e no impulso dun modelo de vida máis responsable e respectuoso co medio ambiente.
O evento contará con sete postos diferentes, un por cada fracción do sistema municipal: orgánico, aceite doméstico usado, téxtil, envases lixeiros, papel e cartón, vidro e fracción resto. En cada posto, a veciñanza poderá aprender de forma práctica e sinxela onde vai cada residuo, resolver dúbidas habituais e descubrir o impacto real que ten a separación correcta no día a día, tanto a nivel ambiental como económico.
Para facer máis dinámica a aprendizaxe, instalaranse tamén tótems informativos interactivos con contidos audiovisuais, explicacións, exemplos e preguntas frecuentes, de maneira que persoas de todas as idades poidan comprender como funciona o sistema e cales son as claves para utilizalo ben.
Ao mesmo tempo, durante toda a tarde haberá xogos e dinámicas para nenas e nenos, retos de clasificación de residuos, explicacións guiadas e espazos de divulgación para adultos. O obxectivo é crear unha xornada familiar, accesible e divertida, que permita aprender mentres se desfruta dun ambiente festivo e comunitario. Ademais, repartiránse agasallos sostibles como embudes especiais para facilitar a reciclaxe do aceite usado, bolsas elaboradas con téxtil reciclado e outros detalles pensados para promover hábitos responsables.
O evento contará tamén un posto de Cáritas no que se poñerá á venda roupa de segunda man grazas á colaboración de Aroupa, promovendo así a reutilización, o consumo consciente e a economía circular. A actividade servirá tamén para dar visibilidade á importante labor social destas entidades e á necesidade de reducir o desperdicio téxtil.
A celebración do Día da Sostibilidade chega nun momento especialmente relevante para O Porriño, xa que a principios de novembro arrancou oficialmente a campaña do colector marrón no municipio, cunha acollida extraordinaria por parte da veciñanza. En apenas dúas semanas superáronse os 500 fogares inscritos, e o Concello ten marcado como obxectivo chegar aos 1.000 antes de que remate o mes.
Grazas a esta participación inicial, xa se están a recoller 2.000 quilos máis de restos orgánicos cada semana, o que supón un aforro estimado de 12.000 euros ao ano no custo de tratamento dos residuos, ao desviar a materia orgánica cara a unha vía de aproveitamento máis eficiente e sostible. Por ese motivo, o Concello anima a todas as persoas que aínda non teñen a súa chave do colector marrón a achegarse ao evento deste sábado, onde poderán recibir información detallada, aprender como funciona o sistema e recoller o seu acceso ao colector de forma inmediata.
O Concello do Porriño quere agradecer profundamente á veciñanza a súa implicación e boa resposta, así como ao persoal técnico e ás entidades colaboradoras que fan posible esta transformación ambiental. A participación cidadá está a demostrar que o cambio cara a un modelo máis sostible é unha responsabilidade compartida e que, coa colaboración de todas e todos, é posible avanzar con decisión cara a un Porriño máis limpo, máis eficiente e máis comprometido coa protección ambiental.
O evento do sábado representa unha oportunidade única para reforzar este compromiso colectivo e para seguir aprendendo de maneira sinxela e atractiva como facer mellor as cousas no día a día. O Concello invita toda a cidadanía a participar nesta xornada, desfrutar das actividades e seguir construíndo entre todas e todos un Porriño máis verde e máis consciente.
As persoas interesadas poden atopar toda a información actualizada na páxina web: porrino.ocaminosostible.gal. Tamén poden contactar a través do teléfono 647 521 464 ou do correo electrónico info@ocaminosostible.gal.
Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do concello por un modelo de xestión sostible e de proximidade, implicando á cidadanía na redución e valorización dos seus propios residuos.
